Beckenham

Úff...

2008-10-07T11:44:00.002+01:00

... hvað það er leiðinlegt að flytja. Við erum á fullu núna að pakka og þó að við séum ekki með mikið af dóti þá er þetta alltaf jafn hrútleiðinlegt. Við náðum að selja öll húsgögnin okkar á ebay, þar á meðal rúmin, svo að núna sofum við á vindsængum sem við fengum lánaðar. Það gæti verið verra, við gætum þurft að sofa á gólfinu. Við vorum svo heppin að sófarnir verða ekki sóttir fyrr en á laugardaginn þannig að við getum ennþá látið fara vel um okkur á kvöldin.

Búin með vettlingana

2008-09-18T14:27:00.002+01:00

Ég náði loksins að klára vettlingana og þó að þeir hafi tekist býsna vel þá eru þeir heldur stórir. Veit einhver hversu mikið Lanett garn hleypur ef það er þvegið í þvottavél við 50°?

Saumaklúbbur

2008-09-12T12:05:00.004+01:00

Mér var boðið í enskan saumaklúbb í gær sem var mjög skemmtilegt og töluvert ólíkt þeim saumaklúbbum sem ég þekki.
Í fyrsta lagi heitir þetta knitting club en ekki sewing club, í öðru lagi var boðið upp á hvítvín og hnetur en ekki kökur og brauðrétti og í þriðja lagi er prjónað allan tímann! Það er auðvitað spjallað og slúðrað heil ósköp en það eru allir að prjóna.
Mér fannst ógurlega gaman að sjá hvernig enskar konur prjóna, þær gera þetta allt öðru vísi en við og þeim fannst held ég jafn furðulegt að sjá mína aðferð, það skrýtna er samt að þrátt fyrir þessar gjörólíku aðferðir er útkoman nákvæmlega sú sama.
Blessunarlega var ég með eitthvað á prjónunum sem ég gat tekið með mér, Vestfirska rósavettlinga, gaman að vera með íslenska handavinnu.

Flutningar

2008-09-09T16:57:00.004+01:00

Við erum búin að kaupa flug til Íslands 10. október svo að það er mánuður þangað til. Við fáum húsið okkar í Hrauntungunni afhent 1. október en höfum húsið hérna til 15. október svo að þetta passar allt ágætlega. En nú þurfum við víst að fara að pakka!

Skemmtilegasta nafnaruglið

2008-09-05T15:00:00.002+01:00

Ruglið í kringum nöfnin okkar er búið að vera alveg ótrúlega skemmtilegt. Bretum virðist finnast það alveg óskiljanlegt að í fjölskyldu sem inniheldur hjón með fjögur börn skuli vera fjögur mismunandi ættarnöfn, enda höfum við mjög oft verið kölluð Mr. and Mrs. Thorisson svo ekki sé talað um öll skiptin sem ég hef verið kölluð Mrs. Skulason. Í gær var hringt til okkar frá Sainsburys, Þórir svaraði í símann og var spurður hvort þetta væri Mr. Sigurgeirsdottir.

Síðasti frídagurinn hjá Vigni

2008-09-03T07:59:00.002+01:00

Í dag er síðasti frídagurinn hjá Vigni, skólinn hans byrjar í fyrramálið. Hann fer á 5. ár, fær nýjan kennara og verður í nýjum bekk þar sem bekkjunum verður skipt upp og raðað í þá upp á nýtt. Borgar byrjar svo í sínum skóla næsta mánudag, 8. september. Það er svosem ekkert sérstakt á dagskrá þennan síðasta frídag annað en að fara með drenginn í klippingu, það er að segja ef ég næ honum frá George vini sínum.

Búin að skila

2008-08-29T08:53:00.005+01:00

Ég fór í gær og skilaði lokaverkefninu mínu og þar með hef ég lokið náminu. Ég er að sjálfsögðu himinlifandi yfir því að vera búin en á sama tíma örlítið leið yfir að náminu skuli vera lokið, þetta er búið að vera svo skemmtilegt. Þórir, Borgar og Vignir fóru með mér og þegar við vorum búin að láta binda ritgerðina inn skila henni og skoða skólann minn héldum við upp á daginn með því að fara í kampavínspiknik í Hyde Park.

Cat woman - 2. kafli

2008-08-27T17:51:00.004+01:00

Frá því að við komum hingað hef ég verið að reyna að laða að mér tvo ketti sem koma stundum í garðinn hjá okkur, við vitum núna að annar þeirra á heima í næsta húsi. Loksins vildu þeir tala við mig því í gær fékk ég að klappa þeim báðum. Þeir eru samt ennþá mjög styggir og hræddir við allar snöggar hreyfingar. Í dag kom svo annar þeirra inn til okkar svo að þetta er allt að koma, þeir verða örugglega orðnir bestu vinir okkar þegar við flytjum aftur til Íslands!

Flutt til Íslands

2008-08-22T09:31:00.005+01:00

Þar kom að því, Atli og Unnur eru flutt aftur til Íslands, fóru á miðvikudaginn. Þau byrjuðu svo í skólanum í gær, fimmtudag,
Atli í Kvennó og Unnur í MH. Það er voðalega skrýtið að þau séu farin, frekar rólegt á heimilinu þessa dagana enda erum við bara fjögur núna.

Skýfall

2008-08-13T11:44:00.002+01:00

Það rignir alveg svakalega hér þessa dagana. Sem Íslendingur þykist ég nú þekkja rigningu býsna vel, en þetta er alveg nýtt fyrir mér. Í gærmorgun vaknaði ég við rigninguna og það var eins og húsið væri staðsett í miðjum Dettifossi þvílík voru lætin.

Home sweet home

2008-07-29T11:24:00.010+01:00

Jæja þá er fríið búið, allavega í bili. Þetta var alveg frábær ferð, ekki rólegasta frí sem við höfum farið í en skemmtileg var það.
Við byrjuðum á að fara til Amsterdam, tókum ferjuna yfir til Calais og keyrðum þaðan. Við vorum tvær nætur í Amsterdam, keyrðum svo yfir til Prag (11 tímar) vorum þar í 2 nætur og enduðum svo á Móseldalnum í Þýskalandi þar sem við vorum tvær nætur í litlum bæ sem heitir Alken og er rétt utan við Koblenz.
Það var náttúrulega stíf dagskrá hjá okkur allan tímann, ekki annað hægt þegar maður skoðar svona mikið á ekki lengri tíma.
Við vorum ekki hrifin af hótelinu sem við vorum á í Amsterdam, það var reyndar vel staðsett, alveg við Dam torgið, en óttalega lélegt. Við byrjuðum á að biðja um ný herbergi og fengum þá aðeins skárri, en næst ætlum við ekki að gista þarna. Í Amsterdam fórum við meðal annars á Dam torgið, í Rauða hverfið og skoðuðum mjósta húsið í Amsterdam. Við fórum líka í Amsterdam Dungeon sem var alveg ótrúlega skemmtilegt og skoðuðum hús Önnu Frank sem ég held að allir sem koma til Amsterdam ættu að gera.
Eftir laaaaaanga keyrslu til Prag komum við á hótelið sem var alveg frábært. Það var aðeins utan við miðbæinn, í göngufæri samt, en þegar við vorum búin að læra á sporvagnana þá var mjög auðvelt að nota þá. Ég held að Prag sé fallegasta borg í Evrópu ef ekki í heimi. Þetta er eins og að vera í ævintýralandi og við bara nutum þess að vera þarna og skoða okkur um. Ég ætlaði að kaupa mér glös í Prag en verðið á þeim er þvílíkt að ég tímdi því ekki. Ég held að það sé ódýrara að kaupa bara tékkneskan kristal í London!
Síðasti staðurinn sem við vorum á var svo Alken í Þýskalandi, pínulítill bær við Mósel. Við áttum ekki pantaða gistingu en fundum hótel þar sem við gátum fengið tvö þriggja manna herbergi. Við erum ekki alveg viss hvort þetta hótel var sérstaklega fyrir eldri borgara, við vorum allavega laaaaang yngst þarna og það voru pissudúkar á öllum rúmum! Við keyrðum eftir Mósel dalnum og skoðuðum Bernkastel þar sem við fengum okkur Svartaskógartertu með kaffinu, og um kvöldið gengum við upp í Burg Thurant sem er kastali fyrir ofan bæinn sem við gistum í.
Á leiðinni þangað fórum við yfir vínræktarsvæði í hlíðinni, og áður en við fórum heim keyptum okkur kassa af hvítvíni sem er búið til úr berjum þaðan.
Föstudagurinn fór svo í að keyra heim og við vorum komin um kvöldmatarleytið, meira að segja á undan áætlun!
Á laugardaginn vorum við svo með grillveislu fyrir vinnufélaga Þóris, mjög skemmtilegt og að sjálfsögðu buðum við upp á hvítvín úr Móseldalnum.
Myndir

Sumarfrí

2008-07-18T08:58:00.005+01:00

Við erum öll í fullu fjöri þó að það hafi ekki heyrst í okkur lengi.
Ég er að vinna í lokaverkefninu mínu, ekki á neinu flugi svosem, en þetta mjakast. Atli og Unnur eru komin í fjarnám í Versló til að undirbúa sig fyrir skólann í haust, og nú er ekki nema mánuður í að þau fari til Íslands. Borgar og Vignir byrja í sumarfríi í sínum skólum eftir daginn í dag og verða í fríi fram í byrjun sepember.
Við erum að fara í ferðalag í fyrramálið. Leggjum eldsnemma af stað, ætlum að keyra til Amsterdam og vera þar í tvær nætur, halda síðan áfram til Prag og vera þar í tvær nætur og síðan í "óvissuferð" um Þýskaland. Við ætlum að keyra gegnum Móseldalinn, óvissan felst í því að við eigum ekki neina bókaða gistingu þar. Þurfum að finna okkur gistiheimili þegar við komum þangað.

Hæ hó jibbý jei...

2008-06-15T09:49:00.002+01:00

Við fórum á 17. júní hátíð hjá Íslendingafélaginu í gær. Fyrst var hátíðardagskrá í St. Lukes kirkjunni í Chelsea og á eftir voru seldar grillaðar SS pylsur og íslenskt sælgæti.
Á 17. júní sjálfan verður eitthvað lítið um hátíðarhöld hjá okkur, bara venjulegur dagur, en ætli við gerum nú ekki gott við okkur í mat og drykk um kvöldið. Við erum vön að grilla á 17. júní og höldum örugglega í þá hefð!

Lukkugrísir

2008-06-11T14:18:00.002+01:00

Það sem kemur hér á eftir er heilagur sannleikur, hversu ótrúlegt sem það virðist!
Eva og Jóhanna vinkonur Unnar voru hjá okkur í síðustu viku og einn daginn keyptu Unnur og Jóhanna sér saman Cosmopolitan blað. Blaðinu fylgdi skafmiði og lukkgrísirnir unnu viku siglingu um grísku eyjarnar fyrir tvo! Þegar Jóhanna var farin aftur til Íslands keypti hún sér annað Cosmopolitan blað sem fylgdi eins skafmiði og vann aðra viku siglingu um grísku eyjarnar fyrir tvo!
Hverjum finnst það þær eigi að bjóða mæðrum sínum með sér í siglinguna?

Unglingar

2008-06-02T09:16:00.005+01:00

Það er búið að vera mikið líf og fjör hjá okkur undanfarið, Róbert vinur Atla var í heimsókn í síðustu viku og Eva og Jóhanna vinkonur Unnar eru búnar að vera hér síðan á miðvikudag.
Á tímabili voru 6 unglingar á heimilinu og mikið fjör - útlitið á unglingaherbegjunum minnir töluvert á myndirnar sem við sjáum af húsnæði eftir jarðskjálftann á Suðurlandi.
Á föstudaginn fórum við öll í tívolí sem heitir Thorpe Park , tókum lest þangað og vorum allan daginn. Það var mjög skemmtilegt, fullt af stórum tækjum, en alveg svakalegar biðraðir í þau. Það var misjafnt hvaða tæki fólk þorði að fara í, sumir létu sér minni tækin alveg nægja!

Áfram Ísland!

2008-05-23T09:39:00.004+01:00

Við horfðum að sjálfsögðu á Eurovision í gær og urðum afskaplega kát þegar kom í ljós að Ísland komst áfram. Við álítum okkur nú eiga dálítinn þátt í því, þar sem við tókum þátt í símakosningunni og kusum úr öllum símum á heimilinu, það voru þó nokkur atkvæði sem Ísland fékk þar!

Glataður/græddur dagur...

2008-05-22T08:15:00.006+01:00

...það fer eftir því hvernig á það er litið.
Ég þurfti að taka eitt próf og hélt að það ætti að vera í dag, fimmtudag. Á mánudagskvöldið komst ég hins vegar að því, mér til mikillar skelfingar, að prófið var á miðvikudegi en ekki fimmtudegi. Þetta þýddi að ég hafði einum degi minna til að læra fyrir það og kallaði á mikinn maraþonlestur.
Í gær fór ég svo í prófið og í staðinn á ég frí í dag. Er maður ekki alltaf að græða?

Íkornar

2008-05-02T09:09:00.002+01:00

Í garðinum við skólann minn býr íkornapar, og þau eru feitustu og gæfustu íkornar sem ég hef séð. Þau sníkja endalaust af fólki sem gengur fram hjá þeim og þegar maður sest á bekkina í garðinum til að borða nestið sitt þá koma þau iðulega til manns og sníkja. Annað þeirra hefur meira að segja skriðið upp á lærið á mér til að sníkja mat. Þetta gerir þau að sjálfsögðu alveg ómótstæðileg og er til þess að lang flestir gefa þeim að borða og þess vegna eru þau orðin alveg spikfeit.
Við Vignir fórum í skólann minn í gær að skila verkefni og hittum annan íkornann (karlinn held ég). Við tókum með okkur hnetur sem við gáfum honum og hann tók sko hraustlega til matar síns!
Myndir

Gleðilegt sumar!

2008-04-24T09:57:00.004+01:00

Sumardagurinn fyrsti er ekki haldinn hátíðlegur hér, svo að í staðinn fyrir skrúðgöngur og hátíðarhöld sem við erum vön þá eru bara allir í vinnu eða skóla, nema Borgar. Hann er heima í dag vegna þess að kennararnir hans eru í eins dags verkfalli í dag.
Ætli við höldum nú samt ekki í hefðina og grillum í kvöld eins og við gerum venjulega á sumardaginn fyrsta.
Við Unnur kvöddum veturinn með stæl í gærkvöldi, fórum og lærðum að dansa salsa. Það eru tímar á hverju miðvikudagskvöldi hérna niðri í bæ, bæði fyrir byrjendur og lengra komna. Við vorum í byrjendahópnum í gær og stóðum okkur bara ljómandi vel þó að ég segi sjálf frá. Í næstu viku ætlum við aftur en þá ætlum við að vera með þeim sem eru lengra komnir!
Upplýsingar um salsaklúbbinn

Skólinn byrjaður aftur

2008-04-21T09:18:00.002+01:00

Skólinn hjá krökkunum byrjaði aftur í morgun. Það gekk alveg ótrúlega vel að koma liðinu á fætur miðað við að það voru allir búnir að snúa sólarhringnum við í fríinu og það komust allir á réttum tíma í skólann. Og nú er bara talið niður í næsta frí!

Grill

2008-04-13T10:46:00.003+01:00

Nú þegar snjórinn er farinn og komið vor í loftið finnst okkur að það sé orðið tímabært að taka grillið fram. Þar sem við áttum ekkert grill til að taka fram þá fórum við og keyptum okkur eitt stykki. Alabama 4 brennara risastórt úr stáli. Okkur brá örlítið þegar við komum með það heim því það virkaði aðeins minna í búðinni, en stór fjölskylda þarf stórt grill svo að þetta er bara besta mál. Við vígðum grillið svo í gærkvöldi með Nýsjálensku lambakjöti og fullt af grænmeti, og það virkaði sko heldur betur vel, hægt að hafa mismunandi hita undir öllu, alveg frábært.
Nú og svo verður bara grillað út í eitt.

Tívolí

2008-04-10T12:44:00.002+01:00

Við skelltum okkur í tívolíið í Crystal Palace í gær, Það er sennilega af svipaðri stærðargráðu og tívolíið í Smáralind, eitthvað fyrir alla.
Við fórum nokkrar ferðir, byrjuðum á að fara í risastórt tæki sem var ekki með neina lágmarks hæð svo að Vignir fékk að koma með í það. Þegar við vorum komin af stað kom í ljós að þetta var algjört hryllingstæki og ég veit ekki hvort okkar, ég eða Vignir, var hræddara meðan á þessu stóð og okkur var sveiflað aftur á bak og áfram á hvolfi yfir hálfa London. Allavega eftir þessa bunu þá kom ekki til mála hjá okkur tveimur að fara í fleiri svona stór tæki, meðalstóru tækin voru alveg látin duga meðan Þórir og Borgar héldu áfram í risatækjunum.
En þetta var samt voðalega gaman, verst að ég er með verki í baki, öxlum og handleggjum í dag, sennilega eftir að ríghalda mér stíf af hræðslu í hryllingstækinu.

Nöfn

2008-04-09T11:32:00.005+01:00

Eftirnafnið mitt er heilir 16 stafir og hér þykir alveg óheyrilega erfitt bæði að segja það og skrifa. Hvað þá þegar öll fjölskyldan er saman og það eru fjögur mismunandi eftirnöfn, öll erfið!
Ég hef þess vegna alls ekki efni á að furða mig á nöfnum annarra, en.... ég er að lesa bók eftir I.T. Hawryszkiewycz. Hvernig í veröldinni ber maður þetta nafn fram?

Snjór!

2008-04-07T07:52:00.003+01:00

Það eru búnar að verða ótrúlegar breytingar á veðrinu síðustu daga.
Á föstudaginn fór hitinn upp í 19 stig og á föstudagskvöldið þegar við vorum á leiðinni heim frá að keyra Atla og Unni á flugvöllinn var alls staðar setið úti og fólk var léttklætt. Í gærmorgun byrjaði svo að snjóa og það snjóaði heilmikið! Fótboltanum var aflýst bæði hjá Borgari og Vigni út af snjónum svo að Vignir fór í staðinn út að leika sér í snjónum. Við skruppum inn í Croydon um hádegið og leiðin þangað var vörðuð snjókörlum!
Myndir

Spring break

2008-04-05T09:03:00.004+01:00

Það er vorfrí í skólunum núna, stendur til 21. apríl. Þetta bætir krökkunum heldur betur upp hvað páskafríið var stutt. Atli og Unnur fóru til Íslands í gær og verða þar í rúma viku, en Borgar og Vignir verða heima, við ætlum að reyna að gera eitthvað sekmmtilegt með þeim á meðan. Við sáum það í gær að í tilefni af fríinu er búið að setja upp tívolí víðs vegar um London, meðal annars eitt í Crystal Palace garðinum sem er ekki langt frá okkur, kannski að við skellum okkur bara í tívolí.

Skattskýrslan frá

2008-03-27T12:09:00.003Z

Við skiluðum skattframtalinu okkar í morgun, ekki nema einum degi eftir skiladag, en heilum fjórum dögum áður en viðbótarfresturinn rann út. Ég held að við höfum aldrei skilað svona snemma áður enda erum við Íslendingar og því tilheyrandi að skila seint. Mér finnst eiginlega alveg ótrúlegt hvað maður dregur þetta alltaf því þetta er orðið svo lítið mál, allar okkar upplýsingar voru komnar inn nema launin hans Borgars, og svo þurftum við að flytja upplýsingarnar um allar milljónirnar sem við áttum á bankareikningum um áramót inn í framtalið í gegnum netbankann, þær voru ekki komnar inn. En það er samt voðalega gott þegar þetta er búið, alltaf eins og hálfgert afrek að ljúka þessu.

Grænmetisfæði

2008-03-25T10:40:00.003Z

Ég hef ákveðið að gerast grænmetisæta. Ekki þó að eilífu heldur bara næstu tvær vikurnar. Það eru eiginlega tvær ástæður fyrir þessu. Sú fyrri er sú að ég hef oft velt því fyrir mér hvernig það sé að sleppa kjöti og fiski, hvort manni líði betur af því og hvort maður verði mjög leiður á matnum sem maður borðar. Seinni ástæðan er sú að það er orðið tímabært að taka hressilega til í mataræðinu hjá mér, það er búin að vera ansi mikil óhollusta í gangi upp á síðkastið og hún náði hámarki um páskana. Svo að nú er það bara hollusta framundan!

Gleðilega páska

2008-03-24T12:27:00.002Z

Páskadagur var frekar hefðbundinn hjá okkur með tilheyrandi páskaeggjaleit og súkkulaðiáti. Krakkarnir fengu send Nóa Síríus páskaegg frá Íslandi og við gáfum þeim líka súkkulaðifígúrur sem voru hundur, kýr og önd. Við Þórir aftur á móti fengum okkur karamellupáskaegg frá Hotel Chocolat sem slær sko Nóa út enítæm!
Það hefur snjóað bæði í gær og í dag og Vignir og George vinur hans sem býr í húsinu á móti voru komnir út snjókast kl. hálf tíu í gærmorgun. Ég hld að þeir hafi náð að skrapa í sinnhvorn snjóboltann því það of hlýtt til að snjóinn festi.
Við vorum að hugsa um að fara í tivolígarð í dag, en ákváðum að fresta því þar sem veðrið er ekkert sérlega skemmtilegt svo að það bíður betri tíma.

Páskafrí

2008-03-21T11:23:00.006Z

Við byrjuðum í páskafríi í dag, loksins! Skírdagur er ekki frídagur hérna svo að það voru bara allir í skóla og vinnu í gær, svolítið skrítið, og svo eru allar búðir opnar í dag. Við Þórir erum að hugsa um að kíkja inn í Bromley á eftir og gá hvort við geum ekki keypt eitthvað smá páskaskraut, mér hefur ekki enn tekist að finna neitt svoleiðis, ætli ég verði ekki að láta mér nægja greinar og páskaliljur að þessu sinni.
Í morgun fórum við Vignir í páskaeggjaleit eða easter egg hunt í Croydon Road Recreational Park sem er almenningsgarður rétt hjá okkur. Við borguðum eitt pund til að fá fötu og fórum svo að leita að litlum trékubbum sem lágu á jörðinni út um allan garð. Þegar búið var að finna 10 kubba fékk maður páskaegg fyrir.

Lögguhúmor

2008-03-14T11:02:00.002Z

Þegar ég fer heim úr skólanum tek ég venjulega Victoria line frá Warren Street yfir á Victoria. Í gær var tilkynning á neðanjarðarstöðinni um að það væru seinkanir á Victoria line vegna "incident with a passenger" og þegar ég kom niður á brautarpallinn var lesin upp tilkynning um að það væru engar lestarferðir í átt að Victoria, farþegar yrðu að nota aðrar línur. Það var lögreglumaður staddur á lestarstöðinni og ég spurði hann hvers vegna þetta væri. Svarið sem ég fékk var "If I tell you that I will have to kill you".

Sirkus Billy Smart

2008-03-09T16:56:00.003Z

Helena og Jonni voru hjá okkur um helgina og á föstudagskvöldið skelltum við okkur öll í sirkus inni í Bromley. Þetta var sirkus Billy Smart, sá sami og var alltaf í sjónvarpinu á gamlárskvöld í gamla daga. Þetta var alveg ótrúlega skemmtilegt! Reyndar voru engin dýr, en það voru loftfimleikamenn og töframaður (sem var frekar hallærislegur þó að atriðið hans væri fínt) og svo alveg frábær trúður. Alveg frábær skemmtun - miklu skemmtilegra en að horfa á í sjónvarpinu!

Eurovision

2008-03-03T10:28:00.005Z

Á þessum árstíma er maður alltaf að byrja að spá í Eurovision, greinilega alveg sama hvar í heiminum maður er. Framlag Englands var valið á laugardagskvöldið og við horfðum á seinni hlutann á dagskránni. Það voru 6 lög sem kepptu í pörum, 3 dómarar í X-factor stíl völdu á milli tveggja laga í einu þannig að þrjú lög komust áfram en þrjú duttu úr keppni. Af þeim þremur sem duttu úr keppni valdi svo aðal dómarinn eitt til að halda áfram, lag sem að hans mati átti skilið að komast í undanúrslit. Síðan var símakosning um hvert þessara fjögurra laga yrði framlag Englands í Eurovision. Og hvaða lag ætli hafi svo unnið? Jú lagið sem datt úr keppni og aðal dómarinn valdi til að halda áfram, skondið ekki satt. Ef þið viljið heyra lagið og sjá flytjandann þá er það hér.
Andy Abraham

Afmæli

2008-02-28T20:35:00.003Z

Jæja þá er afmælistímabilið hafið! Venjulega stendur það yfir í 12 daga en þar sem í ár er hlaupár þá stendur það yfir í 13 daga. Atli og Unnur eiga afmæli í dag, eru 17 ára, ég á afmæli á laugardaginn, Þórir á afmæli á föstudag í næstu viku eða 7. mars og svo Vignir þriðjudaginn þar á eftir eða 11. mars. Það verður nú heldur minna um afmælisveislur en venjulega en í staðinn förum við mun meira út að borða en venjulega!

Sushi

2008-02-16T08:42:00.002Z

Við fórum í heimsókn til Bjarka og Ingibjargar í Canterbury í desember og fengum þá meðal annars kennslu í sushi-gerð. Við erum búin að æfa okkur tvisvar sinnum og þó að við séum ekki næstum því jafn flink og þau þá erum við nú samt bara býsna góð, þó ég segi sjálf frá! Og þetta er svoooooo gott!

Farin til Íslands

2008-02-15T13:04:00.002Z

Jæja þá eru Atli og Unnur farin til Íslands. Þau flugu kl. 8 í morgun, allt gekk vel og þau eru lent. Pabbi Róberts, vinar Atla, sótti þau á flugvöllinn. Það verður væntanlega stíf dagskrá hjá þeim allan tímann meðan þau eru á Íslandi að hitta ættingjana og vinina og þau eru búin að hlakka ógurlega mikið til.

Þroskaður nemandi

2008-02-14T18:41:00.002Z

Ég tók um daginn þátt í vefkönnun á vegum stúdentafélagsins í skólanum. Það var verið að kanna viðhorf stúdenta til félagsins og hversu mikið þeir vissu um starfsemi þess. Ein spurningin var "Are you a mature student (over 23)"

Vorið komið

2008-02-10T17:24:00.000Z

Eftir því sem veðurfræðingarnir segja þá er veturinn búinn og vorið komið. Veðrið er búið að vera alveg frábært undanfarna daga, sól og blíða og blómin farin að springa út, það fer sennileg að líða að vorverkum í garðinum hjá okkur.
Við Unnur fórum í heilsubótarferð inn í Bromley áðan (retail therapy) og settumst á kaffihús, við sátum úti því veðrið var svo gott, 12 stiga hiti og hlýtt og gott í sólinni.

Skór

2008-02-08T06:50:00.000Z

Þetta gætum vel verið við Þórir!

Pancake day

2008-02-06T08:19:00.000Z

Hér í Englandi er enginn Bursting day (Sprengidagur) en í staðinn eru þeir með Pancake day. Mér skilst að hefðin sé sú að þennan dag séu borðaðar pönnukökur með sykri og sítrónu. Þar sem við áttum ekkert saltkjöt, krökkunum til ómældrar ánægju, þá tókum við pönnukökudaginn með algjöru trompi og borðuðum pönnukökur í alla mata! Í morgunmat voru amerískar pönnukökur, í kvöldmat voru fylltar pönnukökur og í eftirrétt voru pönnukökur með súkkulaði og jarðarberjum.

Súkkulaðigosbrunnur

2008-02-02T10:05:00.000Z

Ég hef alltaf verið á þeirri skoðun að súkkulaðigosbrunnar séu frekar ógirnilegir, en í vikunni lét ég undan þrýstingi frá krökkunum og keypti einn. Þeir eru alls staðar á tilboði núna fyrir Valentínusardaginn og ég fékk einn lítinn eldrauðan fyrir slikk.
Í gærkvöldi prófuðum við svo græjuna, vorum með tvenns konar mjólkursúkkulaði sem við bræddum saman og bættum við olíu eins og er mælt með. Útkoman var sko ekki jafn glæsileg og á umbúðunum, þar er mynd af fallega flæðandi súkkulaði sem streymir jafnt yfir gosbrunninn en okkar svona frussaðist meira í gusum og var ekki mjög fallegt, kannski er ekki sama hvaða súkkulaði er notað. En þetta var samt voðalega gott, og við borðuðum einhver ósköp - svo mikið að ég held að mig langi ekki í súkkulaði í bráð!

Beint frá bónda

2008-01-30T12:22:00.000Z

Ég skráði mig í áskrift að lífrænt ræktuðu grænmeti og fékk fyrstu sendinguna í dag. Ég byrjaði nú bara á minnsta kassanum til að sjá hvernig mér líkar þetta, en það kemur mismunandi sending í hverri viku, eftir því hvað er ferskast hverju sinni. Mér finnst ótrúlega spennandi að fá svona grænmetissendingu í hverri viku! Ef ykkur langar til að skoða fyrirtækið þá er þetta slóðin www.riverford.co.uk

Snowey the hamster

2008-01-27T12:05:00.000Z

Bekkurinn hans Vignis á hamstur sem krakkarnir skiptast á að taka með sér heim um helgar. Þessa helgi var komið að Vigni að fá Snowey heim, hann var búinn að bíða með eftirvæntingu eftir því. Hamsturinn er algjört krútt og það fer ekki á milli mála að þessi fjölskylda er búin að vera í gæludýrasvelti í hálft ár, við erum búin að skiptast á að halda á honum og dást að honum alla helgina, ég hugsa jafnvel að greyið litla verði feginn að komast aftur í skólann á morgun þar sem hann fær að vera í friði.

Tannlæknir

2008-01-25T18:35:00.000Z

Við fórum með krakkana til tannlæknis í vikunni, höfum ekki farið síðan við komum hingað. Þetta var bara skoðun, ekkert gert, en þegar kom að því að borga urðum við aldeilis hissa, kostaði ekki neitt!
Þetta er náttúrulega alveg frábært, mikið vildi ég að þetta væri svona á Íslandi!

Komment

2008-01-23T23:21:00.000Z

Ég veit að einhverjir hafa verið í vandræðum með að skrifa komment því það hefur verið beðið um aðgangsorð. Ég held að þess þurfi ekki lengur, endilega prófið :-)

Skólinn byrjaður aftur

2008-01-22T10:46:00.000Z

Ég byrjaði aftur í skólanum í síðustu viku. Ég er í fjórum fögum eins og á síðasta misseri, Database Systems Analysis and Design, Legal and Social Aspects, Server Technologies and Programming og XML. Ég er í skólanum á þriðjudögum frá 2-5, fimmtudögum frá 10-5 og föstudögum frá 2-5.
7. febrúar á ég ásamt tveimur öðrum að stýra umræðum í Legal and social aspects tímanum, umræðuefnið er Health information. Ég get nú ekki sagt að ég hlakki til, en það verður gott þegar þetta verður búið!

Parísarferðin

2008-01-21T09:38:00.000Z

Parísarferðin var alveg meiriháttar skemmtileg. Veðrið var fínt og hótelið alveg ljómandi og hvað er hægt að biðja um meira? Við lögðum af stað kl. 6 á laugardagsmorgun og vorum komin til Parísar um hádegi. Lentum í smá vandræðum með að finna bílastæði en fundum loksins bílastæðahús í göngufæri frá hótelinu. Á laugardeginum fórum við og skoðuðum Notre Dame, röltum um Latínuhverfið og settumst inn á kaffihús þar, fórum svo og skoðuðum Sacre Coeur, röltum um í Montmartre og fengum okkur kvöldmat þar. Við vorum komin seint upp á hótel og allir þreyttir eftir ferðalagið svo að fórum bara beint að sofa. Eftir morgunmat á sunnudag fórum við í Eiffelturninn, fórum alla leið upp á efstu hæð! Skoðuðum svo Sigurbogann og Champs Elysees, komum örstutt við á Bastillutorginu á leiðinni að sækja bílinn,brunuðum svo heim og vorum komin um 11.
Krökkunum fannst svo gaman í París að ég held að þau vilji öll flytja þangað og næst þegar við flytjum til útlanda þá vilja þau að við flytjum til Parísar :-) Við stefnum á að fara í að minnsta kosti eina svona Parísarferð í viðbót, þetta er ótrúlega lítið mál (segi ég sem þurfti ekki að keyra í París).
Myndir

París

2008-01-14T10:42:00.000Z

Við fjölskyldan erum að fara til Parísar um næstu helgi, leggjum af stað á laugardagsmorgun og komum heim aftur á sunnudagskvöld. Við pöntuðum okkur hótel gær, það heitir New Hotel Candide og við völdum það vegna þess að það býður upp á bílastæði og átti laus tvö þriggja manna herbergi.

Til Íslands

2008-01-10T09:30:00.000Z

Atli og Unnur eru á leiðinni til Íslands í febrúar. Þau verða í vetrarfríi 15. - 24. febrúar og ætla að eyða því á Íslandi. Þau fá ferðina frá okkur í afmælisgjöf. Við keyptum flug hjá British Airways, það fer hver að verða síðastur að fljúga með þeim til Íslands, því miður, því þeir eru ódýrastir og Gatwick er næstur okkur af flugvöllunum í London.

Jólin búin

2008-01-07T09:21:00.000Z

Jæja þá eru jólin búin! Við tókum jólaskrautið niður í gær, ég var nú eiginlega búin að fá alveg nóg af því og var hálf fegin að losna við það. Það er nú samt alltaf mun skemmtilegra að setja skrautið upp en að taka það niður.
Atli Unnur og Borgar byrjuðu aftur í skólanum í morgun, en Vignir byrjar ekki fyrr en á morgun. Við vorum búin að gleyma því að hans skóli byrjaði ekki fyr en 8. jan og fórum út í skólann hans áðan, en þar var auðvitað allt lokað og læst.

Gleðilegt ár!

2008-01-04T06:14:00.000Z

Gleðilegt ár öll og takk fyrir það sem var að líða. Við erum búin að hafa það alveg ógurlega gott yfir jól og áramót, vorum í algjörri afslöppun, borðuðum, sváfum, lásum, spiluðum og horfðum á sjónvarpið. Við vorum með gesti yfir áramótin, Ingunn vinkona Unnar og mamma voru hjá okkur. Við elduðum kalkúna eins og venjulega á gamlárskvöld, horfðum á skaupið og fórum svo út kl. 12 að fylgjast með flugeldunum. Það var nú ekki mikið skotið upp! Ég held að allt hverfið hafa verið með álíka mikið af flugeldum og ein meðal fjölskylda á Íslandi, ekki að við getum leyft okkur að hneykslast á því þar sem við keyptum enga flugelda í ár.

Ferð til Belgíu

2007-12-14T09:34:00.000Z

Borgar fór til Ypres í Belgíu með skólanum sínum á þriðjudaginn. Þau eru búin að vera að læra um fyrri heimsstyrjöldina í sögutímum og þetta var hluti af náminu hjá þeim. Það var lagt af stað kl. 5.30 um morguninn og komið heim kl. 23 um kvöldið. Þau skoðuðu meðal annars skotgrafir og hermannagrafreiti og fengu að borða "hermannamat" sem mér skilst að hafa ekki verið jafn vondur og var búist við. Það er jólamarkaður í bænum sem þau fengu líka að skoða og kaupa sér svolítið belgískt súkkulaði. Þetta var auðvitað algjört ævintýri og allir voðalega ánægðir með ferðina.

Jólaundirbúningur

2007-12-10T09:25:00.000Z

Ég skilaði af mér ritgerð síðasta fimmtudag og þar með var hægt að fara að undirbúa jólin. Við tókum örlítið af jólaskrauti með okkur hingað og erum búin að setja það upp. Það er frekar lítið skreytt hér finnst okkur, varla að það sjáist aðventuljós í gluggum eða seríur í trjám, nema í einstaka húsi, en þá eru gjarna fest upp ljós á hvern einasta blett sem hægt er að festa eitthvað á!
Hins vegar eru mjög margir búnir að skreyta hjá sér jólatré, það virðist vera algengt að þau séu skreytt snemma í desember.
Jólafríið hjá mér byrjar 15. desember, en ég á reyndar að skila tveimur verkefnum um miðjan janúar svo að ég verð ekki alveg í fríi. Jólafríið hjá krökkunum byrjar 21. desember og svo byrja skólarnir aftur 7. janúar.

Cat woman

2007-11-19T09:07:00.001Z

Það eru tveir kettir í hverfinu sem koma stundum í garðinn hjá okkur. Þeir eru báðir heimiliskettir, en eru frekar styggir og vilja ekkert tala við mig þó að ég sé mikið búin að reyna að laða þá að mér. Ég hugsaði því með mér að leiðin að hjarta þeirra hlyti að liggja í gegnum magann og fór í Sainsburys og keypti kattamat sem ég setti á disk handa þeim úti í garði. Og viti menn! Með því lokkaði ég alla refina í hverfinu inn í garðinn okkar! Ég þarf víst að finna einhverja aðra leið til að hæna kettina að mér.

Jólamarkaður

2007-11-17T12:14:00.000Z

Við fórum á jólamarkað í St.Pauls kirkjunni sem er hérna í götunni okkar. Á honum var boðið upp á ýmislegt, eins og "nearly new items", fairtrade vörur, kökur, sultur, jólaskraut og ýmislegt fleira. Við Unnur náðum að versla heil ósköp, keyptum bækur handa Vigni, tvö spil, Cluedo og Operation, skál, kökudisk, rósmarínhlaup, smákökur, matreiðslubók, jólskraut... þetta kostaði nánast ekki neitt og er allt til styrktar góðu málefni :-)
Myndir

Kominn vetur

2007-11-16T09:48:00.000Z

Það er orðið ansi kalt hérna núna og greinilegt að það er kominn vetur. Frostið fór niður í -4 gráður í nótt og það er ansi kalt að koma út á morgnana. Vettlingar, húfur og treflar er allt komið í notkun og veitir ekki af! Ég tók þessa mynd út um svefnherbergisgluggann okkar, á henni sést vel hrímið á grasinu.

Puddings

2007-11-08T11:36:00.000Z

Í morgunsjónvarpinu í gær var verið að ræða um að Bretar séu hættir að borða puddings og bresk börn í dag hafi jafnvel ekki smakkað hefðbundna breska eftirrétti. Þetta fannst okkur að sjálfsögðu alveg agalegt og ákváðum að þó að við séum ekki bresk skulum við viðhalda hefðinni. Við Unnur fórum inn í London í gær og þar fann ég mér bók sem heitir Good Old-Fashioned Puddings og nú verður búinn til eftirréttur einu sinni í viku. Hver getur staðist rétti sem heita Apple dappy, Sticky toffee pudding, Jam roly-poly, Hollygog pudding, Whim-wham, Pears in nightshirts, Spotted Dick, Granny's leg ... ekki ég!

Halloween

2007-11-02T09:45:00.000Z

Það var Halloween á miðvikudaginn. Það eru allar búðir búnar að vera fullar af alls konar Halloween dóti, sælgæti, servíettum og fleiru og svo náttúrulega graskerjum! Við keyptum okkur lítið grasker sem við skárum út, gerðum það reyndar í síðustu viku, bara svona til að prófa. Svo keyptum við eitthvað af nammi til að eiga ef einhverjir trick or treaters kæmu. Það komu nokkrar nornir og blóðsugur, en ekkert mjög margir. Við fórum á kynningu í skólanum hjá Atla og Unni um kvöldið kl 18.30 þannig að við vorum ekkert heima - frekar skrýtið að hafa kynninguna þennan dag!
Annars er heilmikið að gera í félagslífinu hjá okkur núna. Um síðustu helgi komu Bjarki frændi og Ingibjörg sem búa í Canterbury í heimsókn til okkar, Vala vinkona mín er í London og ég fór og hitti hana í gærkvöldi og svo eru Ási og Sigrún vinir okkar hjá okkur fram á sunnudag og við ætlum að fara saman á We Will Rock You í kvöld

Lélegur bloggari

2007-10-27T13:24:00.001+01:00

Uss ég stend mig ekki nærri því nógu vel í blogginu, orðið ansi langt síðan ég setti eitthvað inn síðast. Ástæðan er miklar annir hjá mér. Það þýðir samt ekki að það hafi svo mikið spennandi gerst, heldur er bara mikið að gera. Ég á að skila fyrsta verkefninu í skólanum á þriðjudaginn og þetta er jafnframt fyrsta ritgerðin sem ég skrifa í 10 ár! svo að það er dálítið stress búið að vera í gangi. Ritgerðin er eiginlega tilbúin núna, ég á bara eftir að laga "layoutið" á henni.
Það eru miðsvetrarfrí í skólum hér í Englandi, krakkarnir eru allir búnir að vera í fríi síðustu viku. Róbert og Arnaldur, vinir Atla, komu í heimsókn og voru í 5 daga, það var voða gaman að hafa þá. Þórir fór með þá á fótboltaleik á sunnudaginn, West Ham-Sunderland, við skruppum líka inn í London á laugardeginum, en að öðru leyti höfum við ekki gert neitt sérstakt, enda erum við Þórir ekki búin að vera í fríi.
Við förum yfir á vetrartíma í nótt, nánar tiltekið kl. 2, þá færist klukkan aftur um einn klukkutíma. Ég á alltaf svolítið erfitt með að átta mig á tímamismuni og er mikið búin að vera að velta þessu fyrir mér og held að ég sé farin að skilja þetta núna, við fáum að sofa klukkutíma lengur á morgnana eftir breytinguna :-)
Það er eitthvað vesen með hnappinn góða - hann virkar greinilega ekki hjá þeim sem nota Internet Explorer, ég nota Firefox og hann virkar flott hjá mér. Ég þarf að setjast niður og lesa Javascript bækurnar mínar, ef þið viljið kíkja á uppskriftasíðuna þá er slóðin fanneysuppskriftir.blogspot.com

Í skólanum í skólanum ...

2007-10-10T11:39:00.000+01:00

... er svo sannarlega skemmtilegt að vera! Ég er í fjórum fögum á þessu misseri Internet Tecnologies, Introduction to Programming and Scripting, Principles of Computing and Information Technology og Systems Management. Tímarnir eru á mánudögum, þriðjudögum og fimmtudögum svo að ég get notað miðvikudaga og föstudaga til að læra, sem er mjög gott því að þetta er allt alveg nýtt fyrir mér og ég þarf sko að lesa mér mikið til.
Þessar fyrstu vikur erum við aðallega búin að vera að læra HTML og XHTML en í næstu viku byrjum við að læra CSS, JavaScript og fleira.
Eins og þið sjáið þá notaði ég þessa nýfengnu þekkingu mína til að búa til hnapp á bloggsíðuna sem flytur ykkur yfir á uppskriftasíðuna, en því miður nær þekkingin ekki svo langt að ég geti látið hnappinn breyta um lit þegar bendillinn fer yfir hann eða látið bendilinn breytast þegar hann fer yfir hnappinn, en hnappurinn virkar samt alveg, prófið bara :-)

Búin að fá bílinn

2007-10-02T16:06:00.000+01:00

Við erum búin að fá bæði bílinn og GPS tækið og notuðum helgina í að prófa hvort tveggja. Á laugardaginn fórum við í stuttan bíltúr í tvö þorp sem eru ekki mjög langt héðan, Eynsford og Farningham. Þessi þorp eru alveg eins og maður sér í breskum bíómyndum, pínulítil með einni aðalgötu sem fullt af krúttlegum húsum og þorpskráin standa við. Á sunnudaginn fórum við svo í Longleat dýragarðinn. Hann er rétt hjá Bath, u.þ.b. 2 1/2 klukkutíma akstur þangað. Þetta er svona safari garður sem maður keyrir í gegnum á sínum eigin bíl og er þá að keyra í gegnum svæðið sem dýrin eru á. Ég mæli með því að fara í svona dýragarð því þetta er alveg frábær skemmtun. Dýrin eru greinilega vön því að fá bíla og fólk inn á sitt svæði og eru ekkert hrædd, sum voru meira að segja svo athyglissjúk að starfsfólkið þurfti að koma og ýta þeim út af götunni til að umferðin gæti haldið áfram. Skemmtilegast af öllu var samt apasvæðið. Áður en maður fer inn á það eru nokkrar viðvaranir um að maður fari þangað á eigin ábyrgð og að aparnir séu varhugaverðir. Um leið og við komum inn á svæðið komu nokkrir og stukku upp á bílinn hjá okkur og reyndu að losa allt af honum sem hægt var. Við horfðum á tvo apa losa þéttilista af bílnum fyrir framan okkur og þeir reyndu mikið að ná loftnetinu af bílnum okkar, en það tókst sem betur fer ekki.
Eftir dýargarðsferðina fórum við til Bath og skoðuðum okkur aðeins um þar.
Myndir

Viðburðaríkur dagur

2007-09-24T20:19:00.000+01:00

Það var margt sem gerðist í dag
- Borgar byrjaði í nýjum skóla
- ég byrjaði í mínum skóla
- við keyptum okkur bíl
Borgari líst bara vel á nýja skólann - allavega ennþá eftir fyrsta daginn. Nú getur hann farið samferða Atla og Unni bæði í skólann og heim fyrst þau eru öll komin í sama skólann.
Mér líst líka vel á skólann minn. Það er ekki byrjuð hefðbundin kennsla ennþá, fyrsta vikan kallast "induction week" og er notuð í skráningu, kynningar og undirbúningskennslu. Í dag var skráning, fundur með deildarstjóranum, sem heitir Andy Dawson, og kynnisferð um skólann sem er mjög stór! Við erum um 15 sem erum skráð í Information Science, en í Bókasafns og upplýsingafræðideildinni eru um 180 nemendur. Á morgun verða svo áfram kynningar, við skoðum bókasafnið og tölvuþjónustuna og fundum svo meira með deildarstjóranum. Það er mjög gaman að vera loksins byrjuð í skólanum og ég hlakka heilmikið til vetrarins.
Við erum búin að kaupa okkur bíl. Við fundum Chrysler Grand Voyager 1997 sem við ákváðum að kaupa. Hann er með 6 hægindastólum og allur leðurklæddur að innan, algjör lúxusbíll. Það er verið að yfirfara hann núna og við fáum hann afhentan á fimmtudaginn, það verður gaman að hafa bíl og geta skoðað okkur um í Englandi. Til að setja punktinn yfir i-ið fórum við svo og keyptum okkur fish and chips í kvöldmat.
Myndir

Hádegisverður í Langley Park

2007-09-20T15:00:00.000+01:00

Um daginn þegar við vorum að versla í Waitrose kom til okkar kona og spurði okkur (á ensku) hvort við værum að tala íslensku. Þessi kona heitir Dorothy og var gift íslenskum manni í 60 ár. Þau bjuggu hér í Beckenham nánast allan sinn hjúskap, hún býr hér enn en hann dó fyrir nokkrum árum. Við spjölluðum aðeins saman í búðinni og hún fékk hjá mér símanúmerið mitt. Í dag bauð hún mér svo í hádegisverð í golfklúbbnum sínum sem heitir Langley Park Golf Club og er hér í Beckenham. Það var mjög gaman að koma í klúbbinn, ég hef aldrei áður komið á golfvöll og svo var mjög gaman að spjalla við Dorothy enda ætlum við að halda sambandi.

Nýr skóli

2007-09-19T21:09:00.000+01:00

Við fórum í Ravensbourne skólann í dag og ræddum við deildarstjóra 9. árs nema. Eftir að hfa skoðað málið rækilega ákváðum við að færa Borgar yfir í Ravensbourne svo að hann byrjar í nýjum skóla á mánudaginn. Skólabúningurinn í Ravensbourne er gjörólíkur þeim sem er í Kelsey Park svo að hann getur ekki notað neina af flíkunum sem við erum búin að kaupa á hann!
Þegar við komum í skólann í dag byrjuðum við á að fara á skrifstofuna og gera grein fyrir okkur og að við værum komin vegna Borgar Thorisson. Móttökuritarinn hringdi í Mrs. Price (sem er deildarstjórinn) og tilkynnti henni að Mr. and Mrs. Thorisson væru komin til að hitta hana. Við áttum dálítið bágt með að flissa ekki að þessu, fannst svolítið skondið að vera kölluð þetta :-)

Sá á kvölina sem á völina

2007-09-18T20:46:00.001+01:00

Við fengum skilaboð í dag frá Ravensbourne skólanum, sem Atli og Unnur eru í, að það hefði losnað pláss fyrir Borgar þar. Þar sem þeir eru með langan biðlista þurfum við að ákveða okkur á morgun hvort við tökum plássið eða ekki. Við Þórir ætlum að fara þangað á morgun og fá hjá þeim ráðleggingar, vonandi getum við ákveðið okkur eftir það. Borgar er alveg jafn ringlaður og við, er ekki viss hvort hann vill vera áfram í Kelsey Park eða fara í Ravensbourne, en þetta kemur í ljós á morgun!

Afmæli

2007-09-15T08:37:00.000+01:00

Mamma hans Þóris er í heimsókn hjá okkur núna og verður fram á sunnudag. Í gær átti hún stórafmæli, varð 60 ára. Í tilefni dagsins fórum við út að borða á indverskan stað hér í Beckenham sem heitir The Curry Cottage. Þetta er pínulítill staður sem var fullur allt kvöldið og maturinn var alveg frábær! Meira að segja Vignir kláraði allan matinn sinn og það gerist nú ekki á hverju kvöldi. Krakkarnir tilkynntu okkur að naan brauðið þeirra væri það besta sem þau hefðu smakkað, enda var mikið borðað af því. Eftir matinn fórum við niður á High street og tókum þaðan strætó heim. Það var greinilega föstudagskvöld því það var mikið um að vera í bænum, allir barir fullir af fólki og allt iðaði af mannlífi.
Myndir

Lífið að komast í fastar skorður

2007-09-14T09:49:00.001+01:00

Nú eru allir krakkarnir byrjaðir í skólanum og Þórir byrjaður að vinna svo að lífið hjá okkur er óðum að komast í fastar skorður. Minn skóli byrjar 24. september og mér sýnist að ég þurfi að mæta í skólann á hverjum degi fram að jólum. Skólinn hjá krökkunum er frá 8.30 til ca. 15 hjá þeim eldri og 8.50 til 15.30 hjá Vigni. Eldri krakkarnir taka strætó í og úr skóla og við þurfum að fylgja Vigni og sækja hann í skólann.
Það er búið að vera sannkallað sumarveður hér síðustu daga, yfir 20 stiga hiti og sól og ég hef getað flatmagað úti í garði í sólbaði! Maður finnur samt að það er aðeins byrjað að hausta, laufin eru farin að falla af tjánum, það liggja hnetur um allt á jörðinni og það er svalt úti á morgnana þegar ég fer með Vigni í skólann, en það er fljótt að hlýna þegar sólin byrjar að skína.
Við náðum loksins að selja bílinn okkar, hann seldist í gær, svo að nú getum við farið að huga að því að kaupa okkur bíl hérna. Þó að við munum áfram nota almenningssamgöngurnar dags daglega þá verður fínt að hafa bíl - okkur langar til að skoða okkur um í Englandi, keyra eitthað um. Ég veit ekki hvernig bíl við fáum okkur, það er mikill þrýstingur frá börnunum að kaupa einhvern flottari bíl en Fiat Multipla þó að ég viti ekki alveg hvernig það á að vera hægt, ég held að þetta séu flottustu bílar í heimi!
Myndir

Afmælisdagur Borgars

2007-09-06T22:00:00.000+01:00

Í dag er 14 ára afmælið hans Borgars og eins og venjulega þegar hann á afmæli eru veðurguðirnir í sérlega góðu skapi, glampandi sól og blíða í allan dag, hitinn fór í 25 gráður. Í tilefni dagsins fékk afmælisbarnið að velja morgunmat, hann vildi fá amerískan morgunmat, beikon egg og pönnukökur með sírópi. Ég svindlaði reyndar aðeins og keypti pönnukökurnar tilbúnar. Eftir morgunmat fóru Atli, Unnur og Vignir í skólann. Þetta var fyrsti skóladagurinn hjá Atla og Unni svo að þau voru að vonum spennt, nýr skóli og í fyrsta sinn sem þau þurfa að mæta klædd eftir ákveðnum reglum.
Borgar fór í viðtal í Kelsey Park skólanum í morgun og brilleraði alveg í því. Það var skólastjórinn sem tók viðtalið við hann og hann átti ekki til orð yfir það hvað Borgar talar góða ensku. Hann fer í "top" bekki í öllum fögunum sem hann verður í. Skyldufögin eru enska, stærðfræði, raungreinar og íþróttir og svo valdi hann sér að auki viðskiptafræði, frönsku, landafræði og meiri íþróttir. Fyrsti skóladagurinn hans verður á mánudaginn og við fórum inn í Bromley eftir viðtalið til að kaupa á hann skólabúning.
Í kvöld fórum við svo út að borða á Pierluigi's sem er frábær ítalskur staður hér í Beckenham. Þeir bjóða upp pastarétti úr heimatilbúnu pasta og þegar þeir fréttu að Borgar ætti afmæli komu allir þjónarnir og röðuðu sér upp við borðið okkar og sungu afmælissönginn. Unglingarnir fóru nú pínulítið hjá sér en Vignir tilkynnti okkur að hann vildi fara á þennan stað þegar hann á afmæli.
Myndir

Fyrsti skóladagurinn

2007-09-04T22:49:00.000+01:00

Fyrsti skóladagurinn hjá Vigni var í dag. Skólinn hans heitir Worsley Bridge Junior School og er í næstu götu við húsið okkar. Við fórum með hann í heimsókn í skólann í gær, hittum kennarann hans og skoðuðum stofuna hans. Hann þarf að vera í skólabúningi sem við fórum í gær og keyptum.
Í morgun kl. 8.50 hófst svo fyrsti skóladagurinn. Við vorum mætt, ásamt öllum hinum, um kl. 8.45 fyrir utan skólann og það er spurning hvert okkar var kvíðnast, foreldrarnir eða skóladrengurinn! Það er náttúrulega heilmikið mál að vera 8 ára og fara í skóla í ókunnugu landi þar sem maður þekkir engan og skilur varla orð í tungumálinu sem er talað! Kennarinn hans skipaði honum "guardian" sem heitir Ethan og er með honum í bekk og sá strákur átti að sjá um að passa upp á hann. Skólinn var svo búinn kl. 15.30 og þá fór Þórir og sótti hann. Þessi fyrsti skóladagur gekk bara vel. Vigni fannst alveg ágætlega gaman í skólanum og segist hafa eignast fimm vini sem hann man nú reyndar ekki hvað heita, en hann langar alveg til að fara í skólann aftur á morgun.

Gestur í Beckenham

2007-08-31T21:15:00.000+01:00

Þá er fyrsti gesturinn kominn til okkar, mamma kom í gær og ætlar að vera í eina viku. Við byrjuðum á að sýna henni nánasta umhverfið, fórum niður á High Street og svo inn í Bromley. Þar skoðuðum við það helsta - Primark, HM, Topshop, Boots og Caffé Nero, það jafnast fátt á við góða verslunarferð. Hún á nú samt eftir að sjá heilmikið annað en bara búðir meðan hún verður hjá okkur, þetta er bara byrjunin

Túristar í London

2007-08-27T21:55:00.000+01:00

Við ákváðum að skreppa inn í London í dag og taka einn túristahring, þann fyrsta af mörgum. Við tókum lestina inn á London Bridge, gengum yfir Tower Bridge, skoðuðum Tower of London að utan (á dagskránni er að finna út hvort og þá hvenær eru tilboð á aðgangseyri þar inn). Fórum síðan og skoðuðum Big Ben, Houses of Parliament og Westminster Abbey sem var akkúrat verið að loka þegar við komum svo að við náðum ekki að skoða hana að innan. Settumst síðan í St. James's park og drukkum nestið okkar (vorum að sjálfsögðu með piknik kittið með okkur) og enduðum svo á að skoða Buckingham Palace áður en við fórum heim, dauðþreytt eftir allt labbið.
Myndir

Sumardagar

2007-08-26T17:19:00.000+01:00

Loksins er komið gott veður eftir heillangan rigningartíma. Það er búið að vera heitt og sólríkt um helgina, 26 stiga hiti og heiðskírt og verður gott eitthvað áfram. Í gær fórum við í piknik í Croydon road recreational ground, sem er garður niður í bæ. Þar flatmöguðum við í góða veðrinu, borðuðum nestið okkar og strákarnir léku sér í fótbolta.
Í Bromley er alþjóðlegur markaður núna um helgina, laugardag til mánudags. Við fórum þangað áðan og skoðuðum það sem var í boði. Það var heilmikið af mat frá ýmsum Evrópulöndum og líka eitthvað af skrautmunum og alvöru markaðsstemmning í gangi. Við keyptum okkur nokkra osta, foi gras og andalifrarpaté, hefðum getað keypt heil ósköp í viðbót en létum þetta duga.
Myndir

Skólinn fer að byrja

2007-08-24T12:31:00.000+01:00

Atli og Unnur fóru í viðtal í Ravensbourne skólanum í morgun. Viðtalið gekk mjög vel, þau stóðu sig eins og hetjur og komust inn í skólann (það var svosem alveg fyrirsjáanlegt). Skólinn byrjar 5. september og ég held að þau hafi ekki hlakkað svona mikið til að byrja í skólanum síðan þau voru 6 ára. Þau verða saman í einu fagi, en fögin sem þau völdu sér eru:

Atli
Efnafræði
Líffræði
Sálfræði
Stærðfræði

Unnur
Fjölmiðlafræði
Lögfræði
Sálfræði
Viðskiptafræði

Borgar er á biðlista eftir að komast inn í þennan skóla, hans líkur jukust verulega við það að systkini hans komust inn. Hann á öruggt pláss í Kelsey Park skólanum og fer í viðtal þar á afmælisdaginn sinn 6. september.
Vignir fer í Worsley Bridge Junior School sem er í næstu götu við húsið okkar.
Borgar og Vignir þurfa báðir að vera í skólabúningum og þó að það séu ekki lengur skólabúningar í 6th form sem Atli og Unnur fara í þá er samt "dresskode" þannig að þau þurfa að vera klædd á ákveðinn hátt.

Íslenskt sumarveður

2007-08-22T17:23:00.000+01:00

Það væri synd að segja að veðrið væri skemmtilegt, rigning, rok og kuldi. Þetta er eins og íslenskt sumarveður og búið að vera í nokkra daga. Fólkið hér er mjög upptekið af veðrinu, á öllum strætóstoppistöðvum er spjallað um veðrið og sessunautar manns í strætó koma allir með komment um veðrið. Samkvæmt veðurspánni á þetta að lagast á morgun og ætti jafnvel að verða fínt veður um helgina - ég vona það allavega. Við erum frekar löt í þessu slagveðri, erum bara heima við að dunda okkur, lesa og í tölvunni. Við bökuðum pönnukökur áðan, það kom í ljós að desilítramál er ekki til á heimilinu svo að við notuðum sjússamæli til að mæla hveiti og mjólk. Þær urðu samt alveg jafn góðar og venjulega, við borðuðum þær með clotted cream og jarðarberjum (sem við tíndum ekki sjálf), mmmmmmm

Kelsey Park

2007-08-19T19:01:00.000+01:00

Í dag fórum við inn í Kelsey Park. Hann er einn af görðunum hér í Beckenham, ekta piknik garður með stórum grasflötum og háum trjám. Það viðrar bara því miður ekki nógu vel til að fara í piknik, búin að vera rigning síðustu daga og þess vegna allt rennandi blautt. Eftir heimsóknina í garðinn fórum við í strætóleiðangur að leita að jarðarberjaakrinum og fundum hann, nú þurfum við bara að velja okkur tíma til að fara og tína jarðarber.
Myndir

Natural History Museum

2007-08-18T12:11:00.000+01:00

Í gær fórum við að skoða Natural History Museum. Þetta er mjög stórt og ofboðslega flott safn með nánast öllu sem viðkemur náttúrunni. Aðgangurinn er ókeypis svo að við bjuggumst við að það væri troðningur alls staðar en það var bara troðið hjá risaeðlunum, þær eru greinilega vinsælastar. Við skoðuðum þær að sjálfsögðu og líka fuglana, skordýrin, apana, þróun mannsins, geiminn, jarðfræði, þar sem við sáum risastóra hrafntinnu úr Heklu og fórum í jarðskjálftahermi þar sem var líkt eftir Kobe jarðskjálftanum í Japan sem var 7.3 á richter. Við hefðum getað skoðað mikið fleira en þetta var ágætt í bili. Vigni fannst svo skemmtilegt að hann vildi ekki fara heim og þegar hann vaknaði í morgun var það fyrsta sem hann spurði um hvort við gætum farið á safn í dag. Við erum ákveðin í að fara aftur fljótlega og skoða meira.
Myndir

Miðbær Beckenham

2007-08-16T21:49:00.000+01:00

Við röltum með Borgar og Vigni niður í miðbæ í dag, Atli og Unnur fóru með strætó inn í Bromley að skoða í búðir. Miðbærinn hér er ekki mjög stór, en það er dálítið af búðum, kaffhús og mikið af veitingastöðum. Nú og svo eru nokkrir pöbbar. Við settumst inn á Ye George Inn og fengum okkur drykk (það er leyfilegt að vera með börn þar til kl. 7 á kvöldin). Ye George Inn er búinn að vera á þessum stað frá árinu 1662 þó að húsið sjálft sé ekki upprunalegt og lítur út eins og týpískur breskur pöbb með rósóttu gólfteppi og gömlum húsgögnum. Á veggjunum hanga gamlar myndir frá Beckenham sem er mjög gaman að skoða og gefa heilmiklar upplýsingar um sögu staðarins. Á leiðinni heim stoppuðum við svo í kirkjugarðinum við St. George's Parish Church og leituðum að íkornum. Við sáum tvo en hvorugur þeirra var nógu spakur til að koma til okkar og fá hjá okkur hnetur.
Myndir

Strawberry fields forever

2007-08-15T21:33:00.001+01:00

Þegar við vorum hér í Englandi fyrr í sumar sá ég fyrir algjöra tilviljun þegar ég sat í strætó, jarðarberjaakur þar sem hægt er að koma og tína jarðarber gegn gjaldi. Þessi akur er rétt hjá Beckenham, bænum sem við búum í. Ég ákvað þá að þangað skyldum við fara og tína okkur jarðarber þegar við værum flutt hingað. Ekki veit ég hvernig mér datt í hug að ég ætti eftir að muna hvaða strætó á að taka til að komast á akurinn, en því miður skrifaði ég ekkert hjá mér um það og því vitum við ekki alveg hvernig á að komast þangað. Það eru fjórar strætóleiðir sem koma til greina og í dag byrjuðum við að kanna hver þeirra er sú rétta. Við náðum að útiloka eina strætóleið svo að vonandi finnum við staðinn í vikunni og getum farið og tínt okkur jarðarber.

London Zoo

2007-08-13T22:22:00.000+01:00

Við fórum í dýragarðinn í Regents Park í dag. Ég held að það sé sama hversu gamall maður verður, það er alltaf jafn skemmtilegt að fara í dýragarð! Við skoðuðum öll möguleg og ómöguleg dýr allt frá ljónum til sæhesta en það sem stendur uppúr er heimsóknin í skordýrahúsið, ég fæ ennþá hroll við tilhugsunina um pöddurnar þar! Batteríið í myndavélinni okkar gaf sig því miður svo að það er ekki mikið af myndum úr dýragarðinum, en við erum búin að kaupa nýtt batterí.
Eftir dýragarðsheimsóknina fórum við inn í Camden í Offspring skóbúðina þar sem Unnur keypti sér flottustu skó sem hún hefur nokkurn tíma séð!
Myndir

Enskt lambakjöt

2007-08-12T22:04:00.000+01:00

Við elduðum okkur enska bógsteik (boned shoulder) í kvöld. Þrátt fyrir að hafa ítrekað verið vöruð við útlensku lambakjöti, það væri alveg óætt, ákváðum við að vera hugrökk og prófa enska lambakjötið. Útkoman var svona líka góð! Ekkert athugavert við enskt lambakjöt, það er bara alveg ljómandi gott. Við eigum alveg örugglega eftir að elda það oft meðan við erum hér.

7 Ashfield Close

2007-08-11T18:41:00.001+01:00

Húsið okkar er við Ashfield Close sem er lítill botnlangi rétt við æfingasvæði Crystal Palace. Það er á tveimur hæðum, ég veit ekki hversu stórt það er í fermetrum. Á efri hæðinni eru fjögur svefnherbergi og tvö baðherbergi, annað inn af hjónaherberginu. Atli og Unnur hafa sér herbergi en Borgar og Vignir eru saman í herbergi. Atla herbergi verður gestaherbergi þegar við fáum gesti. Á neðri hæðinni er eldhús með borðkrók, stór stofa, gestasnyrting og bílskúr. Úr stofunni er gengið í garð sem snýr í norð-austur. Það er heilmikið dýralíf hérna úti, við heyrum mikið í fuglum og stöku sinnum koma íkornar inn í garðinn. Það er um 7 mínútna gangur á Beckenham Junction lestarstöðina og þaðan náum við lest til London Victoria á um 12 mínútum, við erum sennilega fljótari niður í miðbæ London en margir sem búa í London! Við botnlangann okkar stoppar svo strætó sem gengur inn í Bromley, en þar er stór miðbæjarkjarni.
Myndir

Komin í samband við umheiminn

2007-08-10T22:49:00.001+01:00

Það gengur allt vel hjá okkur, við erum búin að vera á fullu að koma okkur fyrir og kynnast nýju umhverfi. Við byrjuðum á að fara í IKEA og kaupa búslóð fyrir 6 manna fjölskyldu, það hefði verið mun þægilegra ef hún fengist sem pakki, þá hefðum við hugsanlega ekki þurft að eyða 6 klukkutímum í IKEA fyrsta daginn okkar hér! Nú og svo eru ótal hutir sem þarf að eignast - sjónvarp, ryksuga, þvottasnúra, waterfilter ... dósaopnari er ein af nauðsynjununum sem ég uppgötvaði að okkur vantar ennþá.
Við fengum nettengingu og síma í dag, svo að þetta er allt að koma. Við erum öll komin með ný GSM númer svo að ef þið viljið hafa samband við okkur þá virka gömlu númerin ekki lengur.

2007-07-28T13:43:00.000+01:00

2007-07-28T13:26:00.001+01:00

Mynd af húsinu okkar í Beckenham.